ഹോളിവുഡിൽ 2026ൽ ഒരുപിടി വമ്പൻ സിനിമകളാണ് പ്രേക്ഷകർക്ക് മുൻപിൽ എത്താനൊരുങ്ങുന്നത്. ഇക്കൂട്ടത്തിൽ പ്രേക്ഷകർ കാത്തിരിക്കുന്ന നിരവധി ചിത്രങ്ങളിൽ പ്രധാന വേഷത്തിലെത്തുന്നത് ഒരൊറ്റ താരമാണ്, നടി ആൻ ഹാത്ത്വേ. പ്രമേയം കൊണ്ടും അണിയറ പ്രവർത്തകരുടെ പേരു കൊണ്ടുമെല്ലാം ശ്രദ്ധ നേടുന്ന ചിത്രങ്ങളിൽ ആൻ ഹാത്ത്വേ കൂടി എത്തുന്നത് ആ ചിത്രങ്ങളുടെയെല്ലാം ഹൈപ്പ് ഇരട്ടിപ്പിക്കുകയാണ്.
ദ ഡെവിൾ വെയേഴ്സ് പ്രാഡയുടെ രണ്ടാം ഭാഗമാണ് ഇതിൽ ആദ്യത്തേത്. ആൻ ഹാത്ത്വേ തന്റെ പ്രശസ്തമായ ആൻഡ്രിയ സാച്ച്സായി വീണ്ടും ചിത്രത്തിലെത്തും. മെറിൽ സ്ട്രീപ്പിന്റെ കരിയറിലെ ഏറ്റവും പോപ്പുലറായ മിറാൻഡ പ്രീസ്റ്റിലിയെയും എമിലി ബ്ലണ്ടിന്റെ എമിലി ചാർലട്ടണിനെയും വീണ്ടും കാണാൻ കാത്തിരിക്കുന്നവർ ഏറെയാണ്. ഡേവിഡ് ഫ്രാങ്കൽ സംവിധാനം ചെയ്യുന്ന ചിത്രം ഫാഷൻ ലോകത്തെ പുതിയ തരംഗങ്ങൾ ലോകത്തിന് മുൻപിലെത്തിക്കും. മെയ് ഒന്നിനാണ് ചിത്രം തിയേറ്ററുകളിലെത്തുക.
സൈക്കോളജിക്കൽ ഡ്രാമ ത്രില്ലർ ഴോണറിലെത്തുന്ന മദർ മേരിയാണ് ആൻ ഹാത്ത്വേയുടെ അടുത്ത ചിത്രം. മദർ മേരി എന്ന് തന്നെയാണ് ചിത്രത്തിലെ ആനിന്റെ കഥാപാത്രത്തിന്റെ പേര്. ഡേവിഡ് ലോവറി സംവിധാനം ചെയ്യുന്ന ചിത്രം ഏപ്രിൽ 17ന് തിയേറ്ററുകളിലെത്തും.
ഹോളിവുഡ് മാത്രമല്ല ലോകമെമ്പാടുമുള്ള പ്രേക്ഷകർ കാത്തിരിക്കുന്ന ചിത്രമാണ് ക്രിസ്റ്റഫർ നോളൻ സംവിധാനം ചെയ്യുന്ന ഒഡീസി. ഹോമറിന്റെ ഒഡീസിയുടെ ചലച്ചിത്രഭാഷ്യമാണ് അതേപേരിൽ സിനിമയാകുന്നത്. സിനിമയിൽ ഒഡീസിയസിന്റെ ഭാര്യയായ പെനലോപ് ആയാണ് ആൻ ഹാത്ത്വേ എത്തുന്നത്. സിനിമയിലെ ഏറ്റവും പ്രധാനപ്പെട്ട വേഷങ്ങളിൽ ഒന്നാണിത്. ജൂലൈ 17നാണ് ചിത്രം തിയേറ്ററുകളിലെത്തുക.
ഡേവിഡ് റോബർട്ട് മിച്ചൽ ഒരുക്കുന്ന ഫ്ളവർവേൽ സ്ട്രീറ്റ് എന്ന സയൻസ് ഫിക്ഷൻ ചിത്രത്തിലും കേന്ദ്ര കഥാപാത്രം ആൻ ഹാത്ത് വേ ആണ്. ഓഗസ്റ്റ് 14നാണ് ചിത്രം തിയേറ്ററുകളിലെത്തുക. അമേരിക്കൻ സൈക്കോളജിക്കൽ ത്രില്ലർ ചിത്രമായ വെരിറ്റിയിൽ വെരിറ്റി ക്രോഫോർഡ് എന്ന എഴുത്തുകാരിയുടെ വേഷത്തിലാണ് ആൻ ഹാത്ത്വേ എത്തുന്നത്. മൈക്കിൾ ഷോആൾട്ടർ സംവിധാനം ചെയ്യുന്ന ചിത്രത്തിൽ ഡക്കോത്ത ജോൺസണും ഒരു പ്രധാന വേഷത്തിൽ എത്തുന്നുണ്ട്. ഒക്ടോബർ രണ്ടിനായിരിക്കും ചിത്രം തിയേറ്ററുകളിലെത്തുക.
എലോൺ അറ്റ് ഡോൺ ആണ് ആൻ ഹാത്ത്വേയുടേതായി അണിയറയിൽ ഒരുങ്ങുന്ന മറ്റൊരു ചിത്രം. വാർ ഡ്രാമ വിഭാഗത്തിലൊരുങ്ങുന്ന ചിത്രത്തിൽ ആഡം ഡ്രൈവറാണ് നായകവേഷത്തിലെത്തുന്നത്. എയർഫോഴ്സ് കോംബാറ്റ് കൺട്രോളറായിരുന്ന ജോൺ എ ചാപ്മാന്റെ റിയൽ ലൈഫ് സ്റ്റോറിയാണ് സിനിമ പറയുന്നത്. സിനിമയുടെ ഷൂട്ടിംഗ് നടന്നുവരികയാണ്.
ഹോളിവുഡിൽ ഇതിലും മികച്ച ലൈനപ്പുള്ള മറ്റൊരു നടിയോ അഭിനേതാവോ ഉണ്ടാകില്ലെന്നാണ് പ്രേക്ഷകർ പറയുന്നത്. വർഷം മുഴുവൻ ആൻ ഹാത്ത് വേയ്ക്ക് റിലീസുണ്ടല്ലോ എന്നാണ് മറ്റ് കമന്റുകൾ. നീണ്ട നാളുകളായി സിനിമാരംഗത്ത് തുടരുന്ന താരം ഓരോ വർഷം കഴിയും തോറും മികച്ച സിനിമകളുമായി തുടരുന്നതിൽ ഏറെ സന്തോഷമുണ്ടെന്നും ആരാധകർ പറയുന്നുണ്ട്.
Content Highlights: Hollywood Actress Anne Hathaway stuns everyone with an amazing line up of movie releases this year